MULOK DI SEKOLAAN Oleh Yahya Andi Saputra


Sekali tempo aye ketemu seniman Betawi nyang tinggal di kampung Cisalak, Bogor. Die cerite baru aje abis ngikutin perlombaan (festival) kesenian di Bandung, Jawa Barat. Abang seniman kite ‘ntu rada ngedumel di depan aye. Die kate, kesenian nyang die tampilin di Bandung ‘ntu kudunye dapet piale lantaran menurut penonton paling yahud dan rebo. E…, waktu ketue lipri umumin, kite polostomo alias kaga dapet ape-ape. Pas lipri ditanye, kate Abang seniman kite lagi, kesenian nyang kite tampilin bukan kesenian Sunda, melengken kesenian Betawi.

Kate si Abang seniman kite lagi, emang waktu ‘ntu kite bawain kesenian topeng Betawi, nyang di kampung Cisalak kaga ade duenye. Tapi nape kumpulan kite dipilih ngewakilin Bogor, kalo emang topeng Betawi kaga diakuin kesenian Sunda. Nape kaga dari pertame aje panitia nyetop kite, urungin kite, daripade ude ongkos-ongkosan pengabisannye kite dikatain. Waktu ‘ntu panitia cuman angkat tangan, sembari sekali lagi bilang kalo topeng Betawi nyang dibopong dari Cisalak bukan kesenian Sunda.

Begitu pengalaman aye ketemu ame seniman Betawi nyang lagi ngedumel. Fakta di lapangan emang begitu. Maksud aye, banyak seni budaye Betawi idup dan berkembang di lempengen bukan wilayah administratif Provinsi DKI Jakarta. Die idup dan berkembang di wilayah-wilayah budaye Betawi antero Depok, Bogor, Tangerang, Bekasi. Sebut aje misalnye, topeng Betawi yang idup di kampung Cisalak, Bogor, emang lebih sohor disebut Topeng Cisalak. Wayang kulit Betawi yang idup di kampung Tambun, Bekasi, lebih sohor dipoyokin Wayang Tambun. E… ujug-ujug kesenian ‘ntu kaga diakuin ame pemerente Jawa Barat.

Nyang bikin ati pegel sebenernye anak-anak Betawi nyang sekole di Depok, Bogor, Tangerang, dan Bekasi. Anak-anak Betawi ‘ntu mao kaga mao kudu ikutin kewajiban belajar base Sunda atawa seni budaye Sunda. Puguh aje bocah-bocah ‘ntu kelepeken kaga nyambung ame kebiasaannye sari-sari. Mane parannye orang disuruh ngomong nyang omongan ‘ntu kalis dalem lidah mereka. Ampe lindung bebulu atawa gaok berobe kelir jadi kuning, kaga bakalan kecandak.

Dalem ati aye juga ngedumel, sekole kan kudu jadiin bocah-bocah kite pinter tapi nape dipakse-pakse kudu ikutin kewajiban nyang ujung-ujungnye bikin bocah-bocah dongo? Na, tu bocah kaga sengkle lak-lakannye ude bagus.

Nyang lebih nyakitin sebenernye bocah-bocah Betawin nyang sekole di sekolaan Jakarta. Bole dikate bocah-bocah kite ‘ntu dijauin dari bahase dan adat istiadatnye. Masa le pelajaran nyang disebut muatan lokal isinye Bahase Inggris ame komputer. ”Jakarta kota metropolitan, makanye anak-anak sekole kudu diajarin Bahasa Inggris ame komputer biar kaga kampungan,” begitu katenye. Mase petinggi-petinggi kaga bise bedain mane nyang lokal mane nyang mondial. Buset, deh, dongo amat ‘ntu orang pade.

Sebenernye kaga ade alesan kalo petinggi-petinggi ngomong bahwe bahan atawa materi pelajaran muatan lokal buat sekole-sekole SD dan SMP suse ditemuin. ‘Ntu omongan keliwatan bloon. Ini waktu sumber ape nyang suse didapet? Na, nyang di dalem tane aje bise digali, apelagi nyang cuman nyelip di tumpukan arsip. Ecel punye, kalo cuman ‘ntu. Malaan, Babe Ridwan ame Bang Yahya, sejeg taon 2000-an ude nyiapin materi pelajaran muatan lokal buat SD dan SMP. ‘Ntu waktu isi materi ude diseminarin dan dikasih catetan-catetan tambahan oleh pakar, semisal Prof. DR. Azyumardi Azra. Materi ‘ntu kumdian dicitak sebagei buku taon 2001. Malaan ude juga dibikin kaset pendukungnye, yaitu kaset nyanyian permaenan anak-anak.

Materi buku ude komplit. Pegimane anak didik dikenalin ame sejarah Betawi, pejuang/tokoh-tokoh Betawi, tokoh Betawi kontemporen, sastra Betawi, pergaulan idup care Betawi, kesenian Betawi, obat dan pengobatan care Betawi, maenan dan nyanyian Betawi, dan sebageinye. Kalo emang ade kemaoan nyang sungguh-sungguh, buku ‘ntu ude lebih dari cukup sebagei bahan pelajaran muatan lokal.

Titik lemah pendidikan kite bise juga diliat dari sumber daya manusienye. Di Pemprov DKI Jakarta, khususnye di Dinas Pendidikan Dasar dan Menengah, tumplek rupe-rupe guru dari macem-macem etnik. Guru-guru sekole dicomotin (direkrut) dari mane-mane. Cilakanye guru-guru nyang diserain ngajar muatan lokal bukan guru dari etnis Betawi. Orang kate, guru nyang dateng dari udik, ngomong base Indonesia aje ribednye bukan maen, apelagi kalo disuru ngajar muatan lokal Betawi. Pedahal aye tau, untuk ngajar muatan lokal guru-guru ude ditatar duluan. Akhirnye tu guru potong leter, ogah direpotin ame nyang masih asing, dia ajarain aje sebisenye ame care dia sendiri nyang dari udik. Itu sebabnye, anak-anak sekole mingkinan dongo.

Aye sebenernye ude apal kerje birokrat, wabil khusus pegawe pemerentah DKI Jakarta. Die kaga bakalan sungguh-sungguh ngelakonin pekerjaannye. Kalo kate anak sekarang, kaga punye idialisme Betawi. Aye sadar kalo kebanyakan pegawei di Pemprov DKI Jakarta bukan orang Betawi. Lantaran begitu kerje mereka semao-maonye. Die keruk duit proyek turu-turu, ude gitu dianggap beres. Mane sih hasil kerje mereka, khususnye di lengpengan pelestarian budaya Betawi, nyang bikin ati puas? Kalo kerjaan dalem bentuk bangonan fisik paling-paling tahan dua taon, masup taon ketige pade tekope didikit-dikit, trus ambruk. Kalo kerjaan dalem bentuk non fisik, hasilnye goib dan duitnye ludes. Aneh bin ajaib dalem laporan hasil kereje diponten sembilan.

Aye inget kate Bang Teten Masduki, dedengkot anti korupsi, kite sekarang lagi beurusan ame politisi atawa orang tinggi-tinggi nyang busuk. Mangkenye agenda reformasi kaga jalan, kerne politisi nyang kite arep bise bikin perobahan urusan-urusan nyang diwarisin orde baru, nyatenye malaan jadi aktor-aktor utame korupsi. Aye lagi bikin konsep kampanye supaye masyarakat di dalem pemilu nyang bakal dateng kaga milih politisi terkutuk kalo idup kite kaga mao terkutuk. Masyarakat kudu rasional, kaga milih orang nyang kotor.

Pemilu, kate Bang Teten lagi, kalo dipake cuman buat ngesahin orang-orang kotor ngedudukin jabatan publik, ini kan gile! Same aje kite nyerain diri ame perampok! Kite kaga boleh begitu lagi. Kite kudu ajak masyarakat supaye jangan milih politisi kotor.

Aye mupaket ape kate Bang Teten. (Yahya Andi Saputra)