PENGULEKAN NYA’ INDUN


Nya’ Indun ngucapin selamet puase. Nya’ pesen, jangan pade puase gendang, ye! Malu ame diri. Mase ude bau tane puase gendang, puasenye cuman ari pertame ame ari pengabisan, doang, tengenye bolong! Ude gitu kaga terawe lagi. Kaga munasabe. Jangan, ye! Pas puase Nya’ siapin pengulekan nyang isinye peranti buka puase.

Korme
Buka puase sunnahnye pake nyang manis-manis, khususnye buah korme. Manis ‘ntu khsiatnye buat netralin tenage dan peredaran dare kite. Pertame basain tenggorokan kite ame teh manis, terus makan tige biji buah korme.

Buka puase pake korme kaga ngerepotin alias ngga ribed. Sebab korme kaga kudu dibikin, dia ude dikasi nyang kuase. Mulut tinggal mangap, korme masup ke dalem ucus.

Korme dijual di segale warung antero Jakarte, wabil khusus di warung gede. Emang kalo di warung gede mutu korme lebih bagus ketimbang di warung pinggir jalan. Korme nyang bagus ‘ntu belon benyek dan masing jemblis. Kalo dicomot sebiji, nyang laen kaga lengket ngikutin. Kelirnye rade terang kaga butek.

Orang tue-tue biasenye buka puase ude cukup ame segelas teh manis dan tuge biji korme. Die sembayang menggerib. Abis sembayang baru beri makanan nyang laen. Kalo bocah emang kaga ngarti, ape juge disosor sebelon perutnye kemeg-megan.

Es Campur Timun Suri
Bagi orang Betawi, selaen korme, timun suri juge jadi gacoan bulan puase. Timun suri masup buah pilian alias utame. Dalem bahase Melayu, timun suri artinye nyang utame. Mengka itu kite kenal ibu suri, permaisuri, atawa suri teladan.

Orang Betawi nanem timun suri due setengsh bulan sebelonnye dateng bulan puase. Nanemnye kudu telaten. Siram tiap ari. Seminggu sekali dimesin atawa diaurin penggemuk. Kutu dan oteng-oteng kudu dibuangin.

Timun suri ‘ntu lembut dimakannye, pas buat perut nyang kosong lantaran puase. Kalo perut kosong lamenye 12 jem langsung diisi ame makanan keras, tentu ade akibat nyang bakal nimpe kite. Bise jadi perut melintir atawa penyakit mag kambuh. Timun suri jadi pondamen supaye perut kaga kaget mendapet isi. Lantaran daging timun suri lembut, maka perut nerime. Timun suri nyang bagus nyang kelirnye putih dan pulen kaga genye. Baunye wangi. Ketauan dari kulitnye nyang merengpeng atawa meletek dikit-dikit.

Biasenye timun suri dijadiin es campur. Bahan laennye,

timun suri ukuran sekilo
sirop seperlunye
kelape mude diperet
bruluk alias kolangkaling ude dicuci pake aer mateng, dipotong atawa dibele due.
telor kodok (kalo demen, kalo kaga demen jangan dipakein)
es batu seperlunye
aer mateng secukupnye
Buka puase ame es campur timun suri? Waduh… segernye minta ampun.

Kolek Pisang Tanduk
Orang Betawi bikin kolek dari bahan rupe-rupe. Ade nyang bikin dari pisang, singkong, tales, ubi, labu parang, adan sebageinye. Sekarang Nya’ bikinin kolek dari pisang tanduk.

Bahannye,

pisang tanduk
gula jawa
santen encer
santen kentel
selembar daon pandan
Care bikinnye,
pisang tanduk dibelah doa, potong-potong serong kecil atawa segi empat. Gula jawa dimasak sesedengnye biar kentel, ude gitu disaring supaye ampasnye bisa dibuang. Campurin gula jawenye ame santen encer dan daon pandan masak ampe mendidih. Masukin pisang tanduk nyang ude dipotong-potong dan dikolak ampe mateng dan meresep.

Kalo ude mateng lantas dimakannye campurin santel kentel. Ini kolek banyaknye menurut jumlah orang nyang makan.

Kalo pengen kolek kentel, santen encer kaga dipake. Tapi biasenye orang Betawi lebih demen ame kolek nyang pake kuah encer, biar bise diuyup.