SERBA KAMBING Oleh Bang Tab


Pasar Kambing di Jakarta yang tua dan paling sohor ada di Pasar Tenabang. Tempat dimane Serean (Bek) Sabeni berasal. Sampe sekarang menjadi lahan rebutan dan sebagai “peger kampung”, bercokol disitu Bang Ucu (M.Yusuf Muhi) dari IKBT atau Ikatan Keluarga Besar Tenabang. Bener Bang daripade dipegang ame orang luar, kayak Si Hercules asal Timtim padahal negrinye ude nggak ade? Mendingan ente yang pegang!

Dari hal kambing aje kite bisa bikin anekdot dan istilah. Misalnya Kambing Item, Kambing Congek, Kambing Luar Batang dan lain lain. Cerite punye cerite dikeluarin dulu cerite, tentang nomor 35. Huuush…! Nomor togel tuh? (Toto gelap untuk kambing).

Semur Kambing

Lebaran Haji banyak orang motong kambing korban yang bisa dipotong selama 3 hari. Dari hari pertama sesudah Sholat Sunnah Idul Adha sampai besok lusanya. Sebelum lohor H.Machbub lagi nyender dipager jaronye, kemudian lewat H.Abbas naek sepeda. Sepeda Merk Raleigh yang kalo dienjot, bebunyi “tek..tek..tek” dengan bel yang bebunyi krining krining. H.Abas yang pake pici haji, baju koko dan kain sarung Samarinde, cuman melanin sepedenya doang sambil negor H.Machbub

”Asalamualaikum!”

”Mualaikumsalam! Mampir!”

”Insya Allah! Haji… kambing noh!”

”Mulain kapan ane demen ame kambing?”

”Maksud ane daging kambing.”

”Naah... gitu, dong. Anterin entar ye!”

”Buat ape?”

”Kambing ane nggak demen tapi daging kambing ane doyan. Buat dibikin Semur Kambing.”

Daon Pepaye

Bener aje ba’da lohor daging kambing buat H. Machbub dianterin ame Panitia Idul Korban. Langsung aje Mpok Beda’ (Siti Zubaedah) disuruh siap-siap masak daging kambing. Ade yang dibikin sop, semur, gulei dan sate. Supaye empuk daging mau dibungkus daon pepaye.

“Siti… disuruh Si Mamat tuh gaetin daon pepaye bangse 8 lembar! Elu tau kan artinye?”

”Tau Bang Haji! Supaye daging kambing empuk kan?”

”Emang kalo nggak pake daon pepaye, dagingnye bisa kenceng?”

”Bisa Bang Haji!”

”Tapi tangan lu sonder pake daon pepaye, kalo megang daging bisa kenceng juga?”

”Megang daging apaan?”

”Daging “gu (e) lei?”

”Aaah... Bang Haji jorse (jorok)!”

Di Laci

Mpok Beda’ orangnye memang sebet (gesit) kalo ngerjain urusan dapur, bebene (bebenah) ame urusan kamar. Mangkenye die disayang ame H. Machbub. Ba’da lohor H. Machbubn terus makan, dimane semur kambing ludes diembat. Kekenyangan makan H. Machbub rebah-rebahan di atas rosbang, kagak ketinggalan tasbih di tangan kanannye.

Kenyang Betawi laen artinye ame kenyang Bali, kenape? Menurut I Ketut Nyaring, kenyang Bali yang kenceng bukan perutnye! Tapi yang kenceng yang ade di bawah perut orang lelaki, alias ereksi! Ken ken beli?

Keluar deh kalimat kalimat tasbih dalam berzikir “Subhaanallah Wal Hamdulillah Walla Illaahail Allah Allahu Akbar”, terus menerus dan kepala digoyang-goyang. Nggak bunyi merak nggak bunyi sampi, tau-tau dari jauh Mpok Beda’ betreak nanyain konci lemari dimane disimpennye.

”Bang Haji... konci lemari ditaro dimane?”

”Di laci.” (sonder nengok dan terus bace tasbih).

Haji Machbub nerusin zikirnye, tapi yang keluar dari mulutnye bukan lagi kalimat tasbih seperti di atas. Mangkenye H. Machbub dicolek dan ditegor ame anaknye yang bontot Si Ma’mun.

”Be, ko zikirnye yang dibace begituan?”

”Astaghfirullah!” Haji Machbub kaget. Bukan kalimat tasbih yang dibace, tapi kalimat

“di lavim di laci, di laci...”

Tusuk Sate

Trek... tek… tek…tek… dung! Suare beduk Mahgrib digebuk orang terus kedengeran suare adzan. Orang segera Sholat Mahgrib. Ade yang di rumah, di langgar dan ade juga yang di masigit (Bukan Mas Sigit?). H. Machbub pun nggak ketinggalan, berangkat ke masigit yang nggak jauh dari rumahnye. Biasenye H. Machbub baru pulang setelah sholat Isya.

Bangse pukul sengelapan (setengah delapan malem), H. Machbub pulang dan langsung ngancem pemgen makan daging kambing.

Mpok Beda’ ude cari nasi (menata meja makan) dengan segale macem makanan serbe kambing. Sekeluarge ude makan bareng, cuman Mpok Beda’ doang yang belon makan. Ape sebab? Gelas, piring, mangkok sop, sendok dan garpu ude dibenain ke belakang buat dicuci. Tapi H. Machbub belon mundur, die masih ngegadoin sate kambing. Tinggal Mpok Beda’ yang nyender di pintu pangkeng, silap-silap ngeliatin lakinye ngegado sate kambing,. Sambil terus nyiplak H. Machbub nanya dan negesin kebininye.

”Beda’... perasaan gue elu nggak boleh makan sate kambing?”

Iye, Bang! Kan dilarang dokter gare-gare bloedrek (darah tinggi).”

Ude tau bloedrek? Kok elu ngeliatin terus gue makan sate?”

”Makan sate emang nggak boleh Bang Haji?”

”Habis makan apenye dong?”

”Kalo satenye nggak boleh, tusukannye boleh dong buat ntar malem?”

”Boleh, boleh! Tau aje lu kedemenan gue ngirimin tusukan sate?”

Dalam hati Mpok Bede’, dia betreak “Cihuuuy... kebagian juga gue!!!”