PANTANG MAKAN IKAN


Bang Mus (Ustadz Mustafa) adalah panggilan akrab dari anak murid dan warga setempat. Yaitu dibilangan Bidaracina Kampung Melayu, Jatinegara JakartaTimur. Daerah langganan banjir dimana lurahnya dulu, pernah dijabat oleh Bang Daeng Husin Umar. Mantan aktifis KAPPI Exponen 66 dan sekarang bergabung di Forum Betawi Rempug, pimpinan K.H.Fadholi Muhir yang bermarkas di Cakung.

Cerite punye cerite Bang Mus penah diprekse. Bukan diprekse ame Kamtib tapi ame Dr. Hazbullah Thabranie, Anak Betawi dari Kepu Jakarta Pusat. Pak Dokter pernah menjabat sebagai Sekjen IDI DKI Jakarta (Ikatan Dokter Indonesia) dan dosen di FKM UI (Fakultas Kesehatan Masyarakat).

Prekse punye prekse, Bang Mus, alergi terhadap bangse ikan ikanan. Mangkenye ame dokter, sementare waktu dilarang dilaranag makan bangse ikan-ikanan.

Baru 3 hari diprekse dokter, Jum’at pagi Bang Mus ude nongkrong di Lank Mpok Ida Gareng. Makan nasi uduk, ketan urap, pake pesmol, tongkol, bandeng goreng dan ikan teri jengki. Asooy… ibarat pantun jenaka:

Nasi uduk ikan tongkol

Lagi duduk megangin botol?

Kenape pake megang botol segale?

Orangkate isinye sambel cuka!

Nasi uduk ketan urap

Lagi duduk ditabok Arab?

Kenape ditabok sitap?

Orangkate, malem nggak dikasih paginye kalap?

Lagi asyik makan nasi uduk, ketan urap ame lauk-pauk, bininye dateng nyamperin. Bini siape yang nggak bakalan sewot, ngeliat lakinye ngelanggar dokter punya nasehat? Di depan orang banyak, Bang Mus ditegor ame Mpok Nunung pelan-pelan. Maksudnye supaya wibawa Bang Mus tetap terjaga.

“Abang pegimane sih...?”

“Pegimane? Abang pegi nggak kemane-mane?”

“Naah, itu Abang makan nasi uduk, ketan urap pake ikan? Kan dilarang ame Dokter Hasbullah?”

“Nung… coba inget-inget, yang dilarang makan apaan?”

“Abang dilarang makan ‘bangse ikan-ikanan’!”

“Sekarang liat nih yang gue makan, ikan beneran ape ikan-ikanan?”

“Eeh, iye ikan beneran bukan ikan-ikanan. Tapi..bodo’ah! Terserah abang aje! Kalo ade ape-ape tanggung sendiri.”

GEDE SEBELAH

Bang Mat Entong orangnye tinggi gede, palenye botak. Anaknye ade yang lelaki ade yang perempuan. Yang perempuan tampangnye boto-boto (cakep-cakep). Sayang anak yang lelaki jalannya pincang dan dapet julukan Si Dali Tongclek. Artinye Dali anak Bang Mat Entong yang jalnnya nyengclek.

Sepulang dari ngaji di Ustad Dudung yang rumahnya dibelakang Kantor Angin (Badan Meteorologi dan Giofisika) Prapatan Kwitang. Mereka adalah Dali Tongclek, Asmani, Aini, Ainun, Mat Sani dan lain-lain. Dari sekian banyak anak perempuan yang paling boto adalah Asmani.

Sampe dirumah Asmani langsung nangis di depan babenye. Lantara tadi waktu jalan pulang, dade Asmani dicolek ame Mat Sani. Bang Mat Entong menghibur dan berkata :

“Cep-cep-cep sayang, ade ape anak babe nangis?”

“Mat Sani noh, jail, Be!”

“Jailnye kenape?”

“Niih….dade aye yang kiri dicolek ame Mat Sani.”

“Yasalam sekarang mane Mat Saninye?”

“Ngumpet noh, deket pu’un jamblang.”

Bang Mat Entong orangnye emang demen bercande, hatte anak sendiri tetep aje di godain juga. “Ude deh diem! Paranin mendingan Si Mat Sani yang lagi ngumpet di pu’un jamblang!”

Mpok Titing, bininye Bang Mat Entong yang dari setadian ngedengerin, kontan nyamber kayak api nyamber bensin, “Pegimane sih… Bang? Kok anak perempuan disuruh maranin anak lelaki? Kayak tempayan nyamperin gayung!”

“Bukan begitu Ting, daripade gede sebelah? Mendingan minta dicolek lagi yang sebelah kanan!”

“Naudzubillahi Minzdalik? Kalo ngajarin anak yang bener ngape? Dari mane datengnye gede sebelah? Entar malem gue nggak kasih ngegerayang lu!”

NASEHAT SEORANG NENEK

Nyai Moek (Hanifah) panggilan kesayangan dari cucu cucu kesayangannye. Lantaran badannye tinggi gede dan gemuk, warga sekelilingnye manggil dengan sebutan Mak Ipe.

Minggu pagi sepulang dari Acara Hadhir di Habib Ali Al Habsyi, Mak Ipe mampir kerumah cucunye didepan Pondok Rubuh Kwitang. Mak Ipe ude disedian “Meje Nyai” dan puan sirih berikut tempolong dari kuningan. Meje Nyai adalah meja kecil bunder beralas marmer, berikut isinye komplit. Ade daon sirih, pinang, tembako, kapur, gambir.

Duduk deh Nyai Moek dikelilingi cucu cucunye ade 5 orang. Sambil nyisik dan ngegosok gosok telapak tangan kanannye kepaha yang sudah kebiasaan dari sononye.

“Rashid, Yetty, Benno! Besok-besok ude pantes hadir di Habib Ali!”

“Insya Allah Nyai, kalo ade yang ngajak, apelagi ade yang nganterin.”

Panjang lebar nasehat disampein buat cucu-cucu kesayangannye, sebagi bekal dihari tua. Hadhir di majlis takilm Habib Ali sudah dijalani sejak puluhan tahun, mungkin bebarengan ame dibangunnye Mesjid Al Riyadh tahun 1920. Sampai sekarang sudah 3 generasi Al Habsyi memberi ceramah Agama Islam di Kwitang. Mulai dari Habib Ali, Habib Muhammad dan Habib Abdurachman (cucu Habib Ali).

Terjadilah percakapan antara nenek dan cucu-cucu.

“Kalo kite mati dan bisa masuk sorge, enak kite disono. Mau minta ape aje ade dan dikasih.”

“Subhaanallah Alhamdulillah!”, Yetty nyebut.

“Di sorge kite ditemenin ame 7 Bidadari yang cakep dan boto.

Rashid cucu yang paling gede nimpalin, “Kalo kite (lelaki) dapet 7 Bidadari? Perempuan dapet ape? Tarzan?”

“Astaghfirullah! Nggak baek ngomong begitu!”

Nyai Moek ambil napas dalem dalem, terus buang ludah ke tempolong. Giliran cucu ketiga ditanya (Benno), “Ben, pegimane sholat jamaahnye, ude rajin belon?”

“Rajin Nyai! Cuman temen-temen bilang kalo sholat nomor dua.”

“Astaghfirullah! Siape yang ngajarin sholat nomor dua? Sholat musti nomor satu, sebab sholat tiang igama.

Lagi lagi Rashid cucu paling gede nimpalin, “Bener Nyai sholat nomor dua. Sebab nomor satu menurut Rukun Islam adalah membaca Kalimat Syahadat.”

Sambil ngusap dade dan mesem, dalem hatinye nyebut, “Jawabannye memang muter muter, tapi bener, itu tandenya cucu gue pinter-pinter.”

Hilman cucu paling bontot nanya ke Nyai Moek, lantaran die sering dibecandain ame temn-temennye.

“Nyai kalo kite lagi adzan? Boleh nggak adzannye pake pintu lagi ngablak?”

“Astaghfirullah! Mane ade adzan pake gituan? Nggak boleh!”

“Boleh Nyai, boleh,” Rusli cucu nomor 4 nyeletuk.

“Boleh pegimane?”

“Begini Nyai, pas kie mau adzan kayak biasenye, ngeliat ade pintu lagi ngablak.”

“Terus?”

“Pintu ngablak biarin aje die ngablak, abis adzan kite tutup aje pintunye!”

”Naah, gitu dong itu baru namenye cucu cucu nyai.”

Tangan Nyai Moek ngerogo stagen dan ngebuka peniti di selampe jimpo. Dari dalemnye die ngambil duit receh buat dibagiin ke cucu-cucunye sarang seorang 5 sen. Langsung disambut dengan ucapan kompak “Alhamduliullah“.

“Sering-sering Nyai bagi duitnye!”

BUKAN WAW!

Wan Machdor Arab Kwitang, badannye tinggi gede, item dan matenye rade juling. Kemane-mane selalu make kain sarung, enak adem dan murah katenye. Disuruh pake pantalon alias celane panjang, ogah. Katanya kayak orang kantoran.

Sekali waktu Wan Machdor mau beli jadam di Tenabang, die berangkat naek becak langganannye, Bang Cacang.

Kalo ngeliat sejarahnye, becak masuk dan ade di Batavia sejak taon 1936. Dirancang dan dibikin ame orang-orang Cina yang terobsesi oleh kendaraan di negerinye. Yaitu rekshaw dan becak berasal dari kata be (kuda) dan cak (makan). Artinye bekerja kayak kuda menarik sesuatu untuk mencari makan (nafkah). Di Jakarta sesuai dengan Perda No.11 Tahun 1988 becak telah dilarang beroperasi.

Keluar dari pinggir kali ngelewatin Kantor Angin (BMG) dan Gereja Inggris, terus motong Jl. Menteng Raya masuk ke Jl. Asemlama (Jl. Wahid Hasyim). Sebelum ngelewatin tanjakan rel kereta deket pasar Boplo (Bouwploeg), Bang Cacang ude ngambil ancang-ancang buat nanjak. Maklum penumpangnye badannye berat.

Di tengah-tengah tanjakan nggak taunye ade angin kenceng dibarengin ame abu. Otomatis Wan Machdor ngangkat kaennye buat nutupin matenye dari kelilipan abu. Kebetulan ade beberape perempuan lagi jalan kaki melintas rel kereta api sepulang belanje dari Pasar Boplo.

Ngeliat ade pemandangan yang jarang jarang diliat, yaitu pemandangan di atas becak yang lagi nanjak, kaen sarung Arab kesingkap dan ade yang nongol. Kontan orang-orang perempuan pade betreak “WAW…!”

Wan Machdor yang merase dirinye lagi jadi obyek penderita, langsung ngejawab, “Ini bukan Waw tapi Alif..!”

Bang Cacang ikut ikutan menjerit, lantaran salah mencet rem. Bukan batang rem yang dipencet tapi entunye? “Wadaw! Barang gue kepencet gare-gare alif bukan waw?”